Nakalista ro Department of Interior and Local Government (DILG) it 16 nga reklamo halin sa publiko angot sa pagsamantala sigon it pilang kandidato sa mga programa it Department of Social Welfare and Development (DSWD).
Suno sa datos it DILG, pila sa mga ginreklamo hay may kaangtan sa pagpanao it ayuda sa idaeom it Ayuda para sa mga Kapos ang Kita Program (AKAP) ag Assistance to Individuals in Crisis Situation (AICS).
Ginpahayag ni DILG Undersecretary Lanete nga ginagamit sigon it pilang kandidato ro distribusyon it ayuda para madja halin raya kanda, bilang parte it kampanya ag pagbakae it boto.
Nagpaandam si Lanete nga mahugot nga ginabawae ro makarayang ueubrahon, eabi eon sa mga programang exempted sa public spending ban makarong eleksyon.
Ginkumpirma it opisyal nga padaehan it show cause orders ro mga sangkot nga kandidato. Kun mapamatud’an nga eumabag sanda, posible sandang magpangatubang sa disqualification case.
Samtang, padayon nga nakamonitor ro DILG sa iba pang reklamo ag nakikipag-angot sa Commission on Elections (Comelec) para siguruhon ro sangka malimpyo ag patas nga eleksyon.
