Opisyal eon nga naiproklama ro mga Senador nga nagdaog sa May 12 national and local elections.
Ginpangunahan it Commission on Elections ro proklamasyon sa 12 Senador apang uwa nakasipot si Sen. Kiko Pangilinan bangud sa pagtambong nana sa graduation it anang onga sa Amerika.
Sa ginpatigayon nga seremoniya, kada Senador hay gintaw-an it kahigayunan agud nga makatao it pilang minutong mensahe.
Samtang, gindayaw ni Comelec Chairman George Erwin Garcia ro manami nga turnout sa nasambit nga eleksyon.
Suno kana, ro turnout nga umabot sa masobra 82% hay makabig nga pinakamabahoe nga turnout sa kasaysayan it nasyon.
Ginpasaeamatan man ni Garcia ro mga pamatan-on nga botante sa andang pagpasakop ag aktibong partisipasyon sa natabo nga eleksyon.
Gin-insister it Comelec chair nga gamhanan ro suportang ginpakita it mga pamatan-on kapin eon ag mabahoe nga porsyento ro andang numero nga mabahoe man nga factor agud idikta kon sin-o ro mga masunod nga lider it nasyon.
Uman nga ginpasiguro ni Garcia nga naging maayos ag malimpyo ro kabilugang eleksyon.
Raya hay sa pihak it pagduda it iba sa pagguwa it nagkaeain-eain nga isyu kaparehas it overvotes, ag iba pa.
