KALIBO, Aklan — Eubus ro kasubo makaron it pamilya it driver it van nga namatay matapos nga bumunggo sa kasub-eang nga bus sa national highway nga sakop it Brgy. Fragante, Pandan, Antique, agahon it Lunes, Mayo 19, 2025.
Suno kay Mrs. Monasol Nagor, asawa it 64-anyos nga biktimang si Dioleto Nagor, residente it Brgy. Jumarap, Banga nga eubus sanda nga nakibot matapos nga tawagan it pulis nga ro anang mister hay naeakot sa makangieidlis nga aksidente.
Grabeng kahalitan sigon sa ueo ag eawas ro ginkamatay it driver tuga it impact it banggaan kun sa siin haeos nayupi ro bilog nga van.
Ginpahayag dugang it misis nga bandang alas-5:30 it agahon it Lunes hay nagpanaw sa andang baeay ro anang asawa bangud nga may pagasueangon raya nga pasahero sa Antique nga magabakasyon sa Isla it Boracay.
Samtang, ginsaysay nana nga napilitan sanda nga ibaligya ro andang kaugalingon nga van agud nga indi eon imaw magbiyahe ag mag-negosyo eon lang bangud sa anang edad, apang gina-usoy-usoy sigon it anang eawas ro pagmaneho.
Sa pihak nga parte, pilang pasahero it Ceres bus ro nag-angkon it minor injuries ag matapos nga mabueong sa ospital sa Pandan, Antique hay gin-refer sa out patient department.
Base sa bo-oe it CCTV footage, makitang madasig ag nagagewang-gewang ro daeagan it van hasta nga eubusan kara nga inagaw ro pihak nga linya it karsada ag bumunggo sa kasubeang nga bus sa pakurbadang karsada.
Kasunod kara hay inarado it bus ro sangka kongkretong baeay sa kilid it karsada nga sa mayad nga swerte hay owa it tawo sa rato nga pang-orason.
Nagapadayun pa ro imbestigasyon it kapulisan sa nasambit nga insidente.
