KALIBO, Aklan — Padayun nga ginapabaskog it Aklan Police Provincial Office (APPO) ro mga tikang agud nga masiguro ro kaeowasan sa karsada kasunod it natabu nga makangieidlis nga aksidente nga ginkamatay it pilang mga indibidwal.
Ko Lunes, Mayo 19, sangka maduguon nga aksidente ro natabu sa tunga it oil tanker ag tricycle sa banwa it New Washington nga nagresulta sa pagkamatay it tatlong indibidwal ag ginkanina it ap-at nga iba pa.
Raya hay ginsundan it iba pang mga vehicular accidents.
Suno kay P/Capt. Aubrey Ayon, spokesperson it Aklan PPO nga ginlunsar nanda ko Nobyembre it nagtaliwan nga dag-on ro road safety summit kabulig ro iba pang natungdan nga ahensiya it gobyerno.
Kaibahan kara ro pagtau it lecture sa mga road users partikular ro hugut nga pagsunod sa batas trapiko ag pag-dahan sa pagmaneho sa tanan nga oras.
Importante suno kana ro pangmabuhayan nga solusyon agud nga masabat ro mga ugat it aksidente.
Suportado man it kapulisan ro mga inisyatibo para sa pagpamayad it road engineering agud nga mabawasan pa ro mga peligro ag masiguro ro kaeowasan it mga motorista ag pedestrian.
Sa pihak nga parte, sa nakataeana nga pagbukas it klase sa Hunyo 16, magatau man sigon sanda it lecture sa mga eskwelahan agud nga malaygayan ro mga pamatan-an nga indi magmaneho it mga saeakyan kon owa it ginabuytan nga lisensiya .
