KALIBO, Aklan — Ginpaidaeum eon sa full alert status ro bilog nga pwersa it Philippine National Police sa banwa it Malay.
Raya ro ginpahayag ni Police Regional Office (PRO-6) Regional Director PBGen. Josefino Ligan.
Suno kana nga ginpatuman ro full alert status antes pa ro pag-aeabutan it mga delegado it ASEAN Senior Economic Officials Meeting (SEOM) Retreat 2026 sa Boracay umpisa sa Disyembre 10 hasta 13, 2025.
Raya hay nagakahueugan nga kanselado ro tanan nga days-off ag leaves it tanan nga mga tawuhan it Malay Municipal Police Station agud nga mas pang mapabaskog ro seguridad bukon eamang para mga dumueuong nga delegado kundi pati eon man ro mga turista ag mga residente eabi pa ag amat-amat eon nga naga-inabu ro mga bakasyunista para sa holiday season.
Ginpangunahan ni P/Lt. Col. Alain Terence Licdan, hepe it Malay MPS ro deployment briefing it anang mga tawuhan para sa andang assignment, protocol ag rules of engagement.
Samtang, umpisa ko adlaw it domingo, nakakalhit eon sa bilog nga Isla it Boracay ag mainland Malay ro kapin sa 2,100 nga security forces nga ginaeakipan it 1,500 nga pulis ag ginatos nga mga force multipliers halin sa natungdan nga ahensiya it gobyerno.
Suno kay Ligan, maskin nga owa sigon sanda it nabaton nga paeag, kinahangean nga pabaskugon ro seguridad agud nga masiguro ro maayos nga pagpatigayon it mga aktibidad it ASEAN meeting.
