KALIBO, Aklan — Naging “instant hero” sa Australia ro sangka fruit stand vendor matapos kara nga sunggaban ag agawon ro baril it sambilog sa mga umatake sa Bondi Beach, Sydney ko adlaw it Domingo, Disyembre 14, sa sangka selebrasyon it Jewish holiday nga ginkamatay it 16 nga katawo ag ginkanina it 40 nga iba pa.
Suno kay Bombo International News Correspondent Rolan Jon Bulao, sangka Senior Research Contracts Officer sa Australian National University, naging viral ro video, kun sa siin makita si Ahmed Al Ahmed, 43-anyos nga nagadaeagan paagto sa likod it sambilog sa mga armadong eaeaki ag hugut nga gin-agaw ro baril nga may mahabang kanyon.
Apang, matapos maagaw ro baril, ginbinaril man imaw it makapilang beses it sambilog pang suspek ag presenteng nagapaidaeum imaw sa operasyon.
Dugang pa nga sangka fundraising ro ginhimo para kay Ahmed ag nakatipon eon it masobra sa $550,000 sa sueod eamang it 12 oras.
Maabu sigon ro nagdayaw ag nagpasaeamat sa mayad nga kabubut-on ni Ahmed nga ginhimo ro tanan agud nga protektahan ro sin-u man, anuman ro ginhalinan o relihiyon.
Ginpahayag pa ni Bulao nga kaibahan sa mga namatay hay ro napueong dag-on nga unga.
Samtang, ro 24-anyos nga suspek hay presenteng sa ospital sa idaeum it pagbantay it kapulisan matapos barilon it mga awtoridad nga ginkamatay man it anang 50 anyos nga ama.
Presenteng ginakabig nga active crime scene ro lugar matapos maka-rekober ro Australian investigators it daywang improvised explosive devices kara .
Ro Bondi Beach hay sambilog sigon sa pinaka-sikat nga tourist destination sa Sydney ag dagsa ro mga tawo kada summer kapareho makaron .
