MALAY, Aklan — Ginapahauman eon it mga opisyal ag mga residente it Brgy. Yapak sa isla it Boracay ro pagpatigayon it Puka Shell Festival nga nakataeana sa Pebrero 9 hasta 11 it makaron nga dag-on.
Suno kay Kathrine Licerio, tagapaghambae it Malay Boracay Tourism Office nga pila sa mga nakalinyang aktibidad hay ro puka shell presentation, street dancing completion, puka shell handicraft making contest ag iba pa nga nagapakita sa tradisyon ag kultura it mga taga-Yapak.
Umpisa nga ginlunsar ro festival ko 2024 hay kada dag-on raya nga ginadagsa it mga bisita ag turista .
Sa Brgy. Yapak man makit-an ro kilaeang Puka Beach nga kaeabanan nga ginadayo it mga turista bangud nga mag-eowas sa manami nga beach, makita kara ro mga naka-hilerang mga stalls it puka shells nga gina-obrang accessories kapareho it kulintas ag bracelet bilang souvenir items.
Ginpahayag dugang nga pinaagi sa sangka ordinansa hay gintaeana ro festival kadungan it andang kapiyestahan it Our Lady of Lourdes.
Ginaeauman sigon nanda nga mas pa nga magabuhos ro mga turista bangud sa festival.
Dugang pa kara nga base sa kasaysayan, nag-umpisa ro sibilisasyon sa Boracay sa Barangay Yapak bangud sa tradisyon it pagkolekta it mga puka shells para sa barter trade ko 1970s.
Bangud sa praktis nga pagkolekta it puka shells hay naging sikat ro komunidad nga nagresulta sa pagdayo it mga tawo halin sa kaiping nga mga banwa agud nga magpamo-oe it shells.
Ro ginpabaskog sigon nga turismo sa andang barangay hay magaresulta sa pag-umwad it ekonomiya ag dugang nga trabaho sa probinsiya it Aklan.
