BORACAY Island — Nagapamayagpag ro isla it Boracay pag-abot sa international cruise ship travelers kon sa siin sa unang dominggo it buean it Marso hay may nakataeana eon man nga magbisita sa sikat nga isla sakay ro mga dumueong nga turista maghalin sa nagkaeain-eain nga bahin it kalibutan.
Suno kay Kathrine Licerio, tagapaghambae it Malay-Boracay Tourism Office, halin ko buean it Enero hasta it Pebrero hay tatlo eon ro nakabisita nga cruise ship nga nagapamatuod nga padayon nga ginakilaea ro Boracay bilang nagapangunang destinasyon it mga turista sa andang paglibot sa nagkaeain-eain nga sikat nga isla sa bilog nga kalibutan.
Nauna eon nga nakansela ro pagbisita it international cruise ship ko Pebrero 19 bangud sa mabaskog nga baeod sa kaeawran nga nagresulta sa pagdiretso kara sa masunod nanda nga destinasyon.
Nasayuran nga uwa it kaugalingon nga pantalan ro Boracay para sa mga magadungka kunta nga cruise ship kon sa siin ginasueang pa it mga motorbanca ro mga bisita paadto sa pantalan.
Sa Marso 5 hay may nakataeana nga cruise ship arrival ag pagasundan sa Marso 11 ag Marso 23.
