INTERNATIONAL News — Gin-atake it Iran ro 10 nga oil tanker nga nag-agi sa Strait of Hormuz matapos nga owa sigon nagpamati ro mga raya sa paandam nga indi sanda mag-agi bangud nga ginsarado eon ro nasambit nga kadagatan.
Angot kara, bangud nga gusto sa gihapon it mga kompanyang barko nga magbiyahe pasueod ag paguwa sa Persian Gulf karga ro mga langis ag iba pang mga kalakal, ginpahayag it pwersang United States nga paga-eskortan sigon nanda ro mga barko.
Apang nagiging mabangis ro Iran sa pagsarado it nasambit nga kadagatan sa katung-anan it Iran ag Oman ag United Arab Emirates.
Nauna kara, may una eon nga nag-eugdang nga barko nga Skylight, nga ginasugid nga barko man it Iran nga mismong Iran ro umatake ag nagpa-eugdang bangud nga naging iligal sigon ro biyahe kara.
Sangka Iranian warship, IRIS Dena, ro ginpa-eukpan man it torpedo it sangka United States submarine nga ginka-missing it masobra sa 100 nga crew samtang masobra sa 30 nga iba pa ro na-rescue it Sri Lanka navy sa kadagatan it Sri Lanka.
Umpisa ko Sabado matapos nga bombahon it US ag Israel ro Iran, may siyam eon nga barkong pang-giyera it Iran ro ginpa-eugdang it pwersang Amerikano.
