Ginpamilit ni Rosalia Tampos, presidente it mga vendor sa Kalibo Public Market, nga nagkasugot sanda nga dueueungan nga magasaylo sa bag-ong building it tindahan agud nga owa it negosyanteng maaywan, partikular ro mga maga-renta sa ikaywa ag ikatlong panaegan.
Suno kay Tampos, nagkasugot ro mga vendors sa ginpatigayon nga pueong nga pagahueaton lang nanda nga matapos ro konstruksyon bago magsaylo bangud nga peligroso kon pagagamiton ro edipisyo samtang nagapadayun pa ro mga oeobrahon.
Kaibahan sa mga kinahangean nga tapuson hay ro pagbutang it elevator ag lifter, bubungan sa ikatlong panaegan, bastante nga comfort room sa second floor ag transformer para sa suplay it kuryente.
Sa makaron hay nagapadayun pa sigon ro pagpatigayon it flooring, pagpintura ag pagbutang it numero sa mga puwesto sa ground floor.
Ginpaathag ni Tampos nga kun maunang magsaylo ro mga vendor sa ground floor, kapareho it mga nagabaligya it isda, bugas, niyog ag iba pa, posibleng maduea-an it bumaeakae ro mga negosyanteng maaywan sa temporaryong tindahan.
Sa naging pagpueong nanda kaibahan ro lokal nga gobyerno, gintalakay ro mga problemang kinahangean nga masabat bago ro pagsaylo. Nakataeana man nga iga-turn over sa mga vendors ro bag-ong tindahan sa Oktubre 30, apang ginahueat pa ro pormal nga pagpueong kaibahan ro alkalde ag iba pang natungdan nga taeatapan it LGU Kalibo agud nga maistoryahan ro ensaktong petsa it andang pagsaylo.
Nagapanawagan si Tampos sa anang mga kaparehong vendors nga magtiis anay ag maghueat hasta eubusan nga makompleto ro mga kinahangeanon nga pasilidad, agud nga masiguro ro dueueungan nga pagsaylo ag owa it sin-o man nga negosyanteng maaywan.
