Ginaeauman nga pagakontrahon it kampo ni Vice President Sara Duterte ro mga natukiban ni forensic financial analyst Alexander Cabrera angot sa gina-alegar nga ₱817.87 milyong indi maipaathag nga manggad it bise presidente ag ko anang asawang si Atty. Manases Carpio, sa ika-38 nga adlaw it impeachment trial.
Base sa report ni Cabrera nga gin-atubang ko Oktubre 9, kaibahan sa nasambit nga kantidad ro gina-alegar nga owa nadeklarang kwarta, mga propiyedad ag kita nanday Duterte ag Carpio umpisa ko 2022 hasta 2025.
Gin-usisa man it analyst ro andang mga bank ag tax record, negosyo, ag Statement of Assets, Liabilities and Net Worth ukon SALN it bise presidente.
Ginpamilit ni Cabrera nga may mga owa gindeklarang kita halin sa pilang korporasyon ag posibleng owa nagakasinanto nga SALN. Suno pa kana nga limitado eamang ro mga dokumentong anang nausisa rason nga posibleng mas mabahoe pa ro kabilugan nga kantidad.
Gina-angot man sa report ro mga posibleng pageabag sa mga laye kontra sa indi mapaathag nga manggad, anomaliya, ag bukon it tamang pagdeklara it propiyedad.
Sa pihak kara, ro mga raya hay mga natukiban ag alegasyon nga ginaeauman nga paga-atubangon it depensa sa pagbista.
