Bilog ro buot ni dating Chief Presidential Legal Counsel Salvador Panelo nga mapabahin sa defense team ni dating Pangueong Rodrigo Duterte, samtang ginapangatubang it dating presidente ro kasong crimes against humanity sa International Criminal Court (ICC).
Nagpanindugan ro dating Duterte appointee nga gusto nana nga makaibahan sa panel agud makabulig sa pagdepensa sa dating presidente.
Raya man suno kana ro rason kon ham-an it nag-apply imaw it accreditation sa ICC, pilang adlaw eon ro nakataliwan.
Dugang pa it batikang abogado nga gusto man nana nga makasueod ag mabisita si Duterte samtang idto sa anang detention cell sa The Hague ag makaistorya ro dating presidente angot sa anang ginapangatubang nga kaso.
Matapos gindihon ro anang aplikasyon, ginasaligan ni Atty. Panelo nga pagaabuton it waeong buean bago magpaguwa it desisyon ro ICC angot sa anang request.
Nauna eon nga gindihon it onga nana nga si Atty. Salvador Paolo Panelo Jr., ro anang aplikasyon, kaibahan ro tanan nga mga kinahang-eanong dokumento.
