Gin-engganyo it Boracay-Malay Tourism Office ro publiko nga mag-avail eamang it mga accredited tourist services ag mag-subscribe sa mga masaligan nga source samtang nagaplano nga magbakasyon makaron nga summer season eabi eon sa nagahilapit nga Semana Santa.
Ginpahayag ni Kathrine Licerio, administrative officer it BMTO nga sigidas ro andang pag-post sa andang official facebook page kamana man sa website nga Boracay Info Guide it mga lehitimo nga mga travel agencies ag accredited nga mga accomodation establishments.
Ginpaathag kara nga ginapasiguro it mga accredited nga serbisyo ro de-kalidad nga operasyon nga nakabase sa mga minimum nga sueundanan it departamento.
Kadungan kara, ginpaandaman man nana ro publiko nga maging madahan sa mga owa na-verify nga impormasyon sa social media agud nga malikawan nga mabiktima it mga scam nga naga-target sa mga turista, kapareho it mga pekeng accommodation, travel ticket, vacation deal, ag iba pa.
Nasayuran nga nauna eon nga nakabaton ro taeatapan it pilang reklamo kontra sa mga insidente it online scams nga nagagamit it pangaean ag mga litrato it mga lehitimong hotel agud nga makapakalhit it pekeng anunsyo ag promo ag nagakolekta it bayad online.
Kaeabanan nga nagahimo ro mga scammer it dummy ukon peke nga social media account nga nagtanyag it “kaakit-akit” nga mga promo ag gina engganyo ro mga biktima nga magpadaea it bayad pinaagi sa e-wallets, bank transfer, ukon personal nga account.
