KALIBO, Aklan — Mas pa nga ginpabaskog it Philippine Coast Guard Aklan ro mga safety measures sa mga kadagatan it Boracay ag iba pang parte it probinsiya agud nga malikawan ro mga insidente it pagka-eumos ag masiguro ro eowas nga pagbiyahe makaron nga Semana Santa ag Summer vacation.
Angot kara, ginpahayag ni Ensign Jemedy Recto, Deputy Station Commander it PCG Aklan nga nag deploy sanda it mga Baywatch patrol eabi pa amat-amat eon nga nagadagsa umpisa Huwebes Santo ro mga turista sa Isla it Boracay ag iba pang baybayon kamana man ro mga biyahero nga naga-agi sa Caticlan jetty port .
Bukon eamang sigon ro mga nagapaligos nga beachgoers ro andang ginabantayan kundi pati man ro mga pasahero it mga motorbanca ag RoRo vessels.
Samtang, ginpahayag it PCG nga agud nga madugangan ro andang pwersa sa Boracay ag mainland Malay, kapin sa 40 nga mga personnel halin sa ibang sub-station ro gin-augment kanda .
Sa kamatuoran suno kana ko Pebrero pa eamang hay nagpatigayon eon sanda it vessel safety enforcement inspection agud nga masiguro nga ro tanan nga mga nagabiyahe nga sakayang pandagat sa probinsiya hay may nagakaigo nga mga dokumento ag nakakasunod sa safety standards.
Sigidas man ro andang pre-departure inspection adlaw adlaw agud nga masiguro nga owa it matabu nga overloading ag may nagakaigo nga numero it life saving equipment partikular ro life jacket.
Padumdum dugang nga likawan nga magpaligos sa baybay kon naka-inom.
Sa pihak nga parte, base sa andang record, ginpaabot ni Recto nga ko buean it Marso hay nakalista sanda it 200,165 tourist arrival sa Isla it Boracay ag 700 sa Buruanga .
