Magataeana ro United Kingdom it kapin sa £660 million ukon katumbas it masobra sa $892 million sa France sa sueod it tatlong dag-on bilang kaparte it bag-ong kasugtanan agud nga pugngan ro pagtaas it illegal migrant crossings sa English Channel.
Suno sa mga opisyal, ro pondo hay pagagamiton agud nga pabaskugon ro seguridad sa baybayon it northern France, kun sa siin nakalista it libo-libong iligal nga pagtabok it mga migrante paagto sa UK.
Base sa datos, nag-abot sa masobra 41,000 katawo ro nagtabok sa Channel ko 2025, nga haeos katumbas it record ko 2022.
Sa idaeum it kasugtanan, ro £500 million hay igataeana para sa pagpabaskog it enforcement operations, kaibahan ro pag-deploy it haeos 1,100 nga tawuhan it kapulisan, intelligence operatives, ag military personnel sa mga coastal areas.
Dugang pa kara nga igapaguwa eamang ro £160 million kun mapamatud-an nga epektibo ro mga bag-ong tikang sa pagbawas it crossings. Engkaso nga indi magmadinaeag-on, posibleng punduhon ro nasambit nga pondo matapos ro sang dag-on.
Pagabayluhan it nasambit nga kasugtanan ro naunang three-year agreement ko 2023 nga nagabalor it kapin sa £480 million.
Kaibahan sa bag-ong plano ro pagbilog it 50-katawong riot police unit, mas ginpaeapad nga intelligence ag judicial teams, ag dugang nga maritime patrols.
Magagamit man it drones, daywang helicopter, ag upgraded camera systems ro daywang nasyon para sa mas hugut nga pagbantay sa kadagatan.
Magadugang man ro France it bag-ong patrol vessel ag masobra sa 20 maritime officers agud nga pugngan ro mga baroto nga ginagamit sa pagtabok.
Suno sa UK government, ro gintingub nga operasyon it daywang nasyon hay nakapugong sa masobra sa 42,000 nga mga iligal nga nagatabok umpisa nga magpungko ro government Labour sa pagdumaea ni Prime Minister Keir Starmer ko Hulyo 2024.
