Dapat nga sundon ro Konstitusyon.
Raya ro gin-insister ni Senate President Vicente “Tito” Sotto III. Suno kana nga obligadong mag-convene bilang Impeachment Court ro Senado sa oras nga mabaton nanda ro Articles of Impeachment kontra kay Vice President Sara Duterte halin sa Kamara.
Klaru suno kana nga ginamandu raya it Konstitusyon ag owa kara it eabot ro political discretion ukon debate.
Ro anang pahayag hay kasunod it hitabu sa House of Representatives, kun sa siin, nagkaeasugot nga gin-aprubahan it Committee on Justice ro committee report ag Articles of Impeachment kontra kay Duterte sa botong 55-0. Bangud kara, ginaeauman nga maipasa eon raya sa plenaryo it Senado para sa pagbista.
Base sa committee report, nakakita ro mga mamalidha it probable cause base sa mga ebidensiyang ginplastar sa mga pagpamati, kaibahan ro mga alegasyon it saea nga paggamit it confidential funds, korapsyon, ag iba pang mga kasong pwedeng maging basehan it impeachment.
Sa oras nga naaprubahan it indi maganaba sa 1/3 it mga miyembro it Kamara, pormal nga igapadaea ro Articles sa Senado para sa pagbista.
Ginhimo ni Sotto ro pahayag bilang sabat kay Senador Robin Padilla, nga naunang nagpahayag nga pagabaeabagan it minorya sa Senado ro anumang tikang it mayorya angot sa impeachment, bangud nga obligasyon sigon it minorya nga i-challenge ro mga aksyon it mayorya.
Samtang, ginklaru man ni Senador Imee Marcos nga owa pa it pinal nga kasugtanan ro mga senador. Suno kana nga ginahueat pa nanda ro opisyal nga pagpasa it mga dokumento it impeachment ag nagapahaum eon man para sa posibleng full trial sa oras nga raya hay umpisahan eon.
Sa idaeum it Konstitusyon it Pilipinas, sa tiempo nga maipasa it Kamara ro Articles of Impeachment, awtomatikong makaangkon it hurisdiksyon ro Senado bilang impeachment court agud nga bistahon ro kaso kontra sa mga opisyal nga pwedeng ma-impeach, kapareho it Bise Presidente.
