Temprano nga natapos ro kampanya ni Alex Eala sa French Open matapos imaw nga piyerdihon ni Iva Jovic sa straight sets, 6-4, 6-2, sa unang round it torneo, adlaw it Martes.
Madasig nga naka-abanse si Jovic sa unang set matapos umabante sa 5-1 lead. Sa pihak kara, nakabawi si Eala kat magdaog sa tatlong sunod nga hampang agud nga panabaon ro agwat. Apang insigida man nga nabawi ni Jovic ro momentum agud nga eubusan nga mabo-oe ro unang set.
Sa ikaywang set, si Eala ro unang nakapuntos bago nagdaog si Jovic sa sumunod nga daywang hampang. Nakadugang pa it sangka hampang ro Filipina tennis star, apang eubusan eon nga umabante si Jovic matapos dominahon ro nabilin nga parte it hampang.
Presenteng world no. 17 si Jovic nga 18-anyos pa eamang, samtang si Eala, nga kan-o eamang nagselebrar it anang ika-21 nga kaadlawan hay una sa world no. 37 ranking.
Sa pihak it pagkatagak sa singles competition, magapadayun pa gihapon si Eala sa doubles tournament kaibahan si Victoria Mboko sa clay-court Grand Slam.
