Bangud sa sobrang kauhawon ro naging rason it pagkamatay it 49 nga katawo sa Sahara desert district sa Niger matapos nga masamad ro andang ginasakyan nga truck sa tunga it disyerto.
Ro mga namatay hay kaibahan sa grupo nga nakataeana eon kunta nga maga-uli halin sa Mali para sa sangka Muslim festival kat maubusan sanda it tubi.
Suno sa Agadez governorate, una sa 80 kilometers west it Assamaka ro lokasyon it mga biktima rason nga masyado sanda nga maeayo sa supply it tubi ag nagdugang pa ro grabe kainit nga temperatura.
Pahayag pa it governorate, nga owa gid maka-ayad ro truck sa pihak it pagtinguha it driver, kaibahan ro anang assistants ag iba pa nga mga pasahero.
Gin-eubong eon lang ro mga biktima sa mass graves.
Daywa ro naka-survive matapos sanda nga magtikang it haeos 50 kilometers paagto sa maeapit nga water source paagto sa Assamaka, kun sa siin ginpaabot nanda sa mga otoridad ro andang gindangatan.
Ro nasambit nga disyerto hay kilaea man nga aeagyan it mga migrants nga gusto nga mag-agto halin sa African nations patabok sa Europe ag maabu ro nagakamatay sa uhaw ag gutom samtang nagapanaw sa mainit nga baeas.
