Nagkasugot ro Israel ag ro grupong Hezbollah sa sangka ceasefire sa Lebanon ko adlaw it Biyernes, suno sa sangka opisyal it Estados Unidos, matapos ro panibag-ong pag-grabe it bakbakan nga nagbutang sa aeang-aeang sa paghaeambaeang pangkalinungan sa Middle East.
Suno sa nasambit nga opisyal, nag-umpisa ro ceasefire bandang alas-4:00 it hapon sa Lebanon.
Naging importante sigon ro papel it mga negosyador halin sa Estados Unidos ag Qatar sa pagbilog it kasugtanan sa bulig man it Iran.
Antes ro kasugtanan, nagtuhaw it uman ro bakbakan sa tunga it daywang parte.
Suno sa report, 18 nga katawo ro namatay sa mga airstrike sa Lebanon samtang ap-at nga soldadong Israeli man ro napatay sa mga opensibang ginpatigayon it Hezbollah.
Kasunod it tensyon sa Lebanon, nakansela man ro nakataeanang pag-istorya it Estados Unidos ag Iran sa Switzerland ko Biyernes.
Ginpahayag it sangka mataas nga mamalidha it Hezbollah, ginpaabot sigon it Iran sa grupo nga indi pwedeng magpadayun ro pakikipag-istorya sa Estados Unidos kun owa it komprehensibong ceasefire sa Lebanon.
Samtang, owa direktang gintalakay it tagapaghambae it foreign ministry it Iran ro nakanselang pag-istorya sa Switzerland, apang ginpahayag kara nga may direktang saeabton sigon ro Estados Unidos sa mga pag-atake it Israel sa Lebanon.
Dugang pa kara nga haum ro Tehran nga obrahon ro tanan nga kinahangeanon nga tikang agud nga protektahan ro interes it nasyon.
