Gindakop it Kalibo Municipal Police Station ro 43-anyos nga eaeaki nga residente it Barangay Poblacion, Kalibo, Aklan matapos nga serbihan it warrant of arrest nga gin-isyu it Regional Trial Court Branch 3 sa Kalibo, nga may kaangtanan sa kaso nga slight physical injuries.
Suno kay Police Lt. Col. Jeric Vargas, hepe it Kalibo MPS, ginaturo nga nag-ugat ro kaso sa insidente nga natabo sa Pastrana Park ku Marso 2026, kun sa siin ku una hay may kaso nga may kaangtanan sa child abuse nga ginfile bangud menor de edad ro biktima.
Apang matapos ma-review ro kaso, hay ginpanaba raya bilang slight physical injuries. Uwa man nagkontra ro akusado sa pagserbe it warrant.
Nakabayad it P3,000 nga piyansa ro akusado para sa temporaryo nga kahilwayan samtang ginapadayon ro proseso sa korte.
Ginpahayag ni Vargas nga padayon nga gina-monitor it Women and Children Protection Desk ro menor de edad nga biktima, samtang ginapangabay man it Kalibo MPS sa publiko nga dayon ireport sa kapulisan ro mga insidente ukon krimen agud maaksiyonan raya ag mapabilin nga malinong ro banwa it Kalibo.
