Nag-walkout ro delegasyon it Iran halin sa venue it negosasyon sa Switzerland, nga nagatuyo nga wakasan ro giyera sa Middle East, matapos magpaandam it pag-atake si US President Donald Trump kontra sa Islamic Republic bangud sa suporta kara sa grupong Hezbollah sa Lebanon.
Suno sa report it Iran state media, nagguwa ro delegasyon it Iran sa Bürgenstock Resort matapos ro andang pakikipagpueong sa delegasyon it Qatar nga nagasirbing sambilog sa mga tagapatunga.
Kadungan kara, nag-post man si Trump sa X (dating Twitter) agud nga umanon ro anang mga paandam ag pahayag kontra sa Iran.
Sa pihak it insidente, ginpamilit it sangka diplomat nga may kahilabtanan sa mga pag-istorya nga owa pa eubusang nagsurender ro parte it Iran sa mga negosasyon ag nagapabilin gihapon sanda nga “engaged.”
Nauna eon nga nagpaandam si Trump nga paga-atakehon ro Iran kun indi eagi kara pagapugngan ro ginatawag nana nga mga bayarang “proxies” sa Lebanon nga nagahimo it kinagamo.
Insigida man raya nga ginsabat it Islamic Republic. Suno kay Mohammad Bagher Ghalibaf, ro chief negotiator it Iran, mayad nga mag-dahan ro US sa mga pahayag kara bangud nga haum ro andang armadong kusog nga magsabat sa ibang pamaagi.
Samtang, suno sa sangka senior US diplomat, ginaeauman nga pagapadayunon ro mga negosasyon sa tunga it US ag Iran, gabi-i it Lunes.
Gin-umpisahan ro US-Iran talks ko Domingo, matapos ro kasugtanan it daywang parte ko nagtaliwan nga domingo nga makaangkon it deal sa sueod it 60 diyas para tapuson eon ro giyera sa Middle East.
