Ginpasiguro it Department of Agriculture nga bastante ro suplay it pagkaon sa nasyon sa pihak it posibleng epekto it El Niño sa mga pananum ag alagang sapat.
Suno kay Agriculture Secretary Francisco Tiu Laurel Jr., may bastante nga suplay it manok para sa 125 diyas ag baboy para sa 170 diyas. Owa man naapektuhan ro suplay it bugas bangud sa napuno nga mga dam tuga it mga pag-uean, maskin nga posibleng mabatyagan ro epekto it El Niño sa produksyon kara sa masunod nga dag-on.
Samtang, naapektuhan eon ro mga pananum nga mais, partikular sa Isabela, nga nagtuga it pagtaas it presyo kara. Bilang sabat, ginpapanaog it gobyerno ro taripa sa imported corn ag gindugangan ro minimum access volume kara.
Gin-engganyo man it sekretaryo ro publiko nga panipuslan ro mga sanga it Kadiwa ng Pangulo para makabakae it mas baratong pagkaon, kaibahan ro ₱20 kada kilong bugas it gobyerno.
