Tatlong buean matapos ipatuman it Australia ro pagbawae sa social media para sa mga owa pa it 16-anyos, nagguwa sa sangka pagtuon nga kaabuan sa mga pamatan-on hay padayun sa gihapon nga nagagamit it mga online platform.
Suno sa eSafety, ro internet safety regulator it Australia, owa naging epektibo ro pagpatuman it age verification it mga social media platforms, rason nga maabu sa gihapon nga mga menor de edad ro nakaka-access ukon nakakahimo it bag-ong account.
Ginpakita man sa pagtuon nga haeos owa nagbag-o ro screen time ukon paggamit it social media it mga unga nga naga-edad it 10 hasta 15, tatlong buean matapos ipatuman ro laye.
Maskin nga nagnaba ro numero it mga unga nga may kaugalingon nga social media account, nagapabilin sa masobra sa 80 porsiyento ro nagagamit it mga platform kapareho it YouTube, TikTok, Snapchat, Facebook, ag Instagram.
Bangud kara, nagapadayun ro imbestigasyon it Australian government sa pilang mabahoe nga tech companies angot sa posibleng owa nanda pagsunod sa bag-ong laye.
Madumduman nga ro Australia ro kauna-unahang nasyon nga nagpapanaog it nationwide ban sa social media para sa mga owa pa it 16 anyos bilang tikang agud nga maprotektahan ro ikamayad nga eawas ag kamaeayran it mga pamatan-on sa nasyon.
