Ginpabakod it Kamara ro House Resolution No. 1286 bilang pagtamyaw ag pagkilaea sa dungog nga gin-uli ni Filipina tennis star Alex Eala matapos nga maangkon ro anang kauna-unahang Women’s Tennis Association ukon WTA singles title.
Nagkasugot ro mga mamalidha nga kilaeahon ro makasaysayang kadaeag-an ni Eala sa 2026 Mubadala DC Open sa Estados Unidos, kun sa siin, ginpiyerde nana ro World No. 3 ag tournament top seed nga si Jessica Pegula.
Suno kay House Majority Leader Sandro Marcos, dungog para sa bilog nga nasyon ro naging kadaeag-an ni Eala bangud nga ginpakita kara sa bilog nga kalibutan ro kamayad, kapag-on ag determinasyon it mga Pilipino.
Dugang pa nana nga ro pagsaka ni Eala sa world tennis rankings hay bunga it anang kahugod ag tiyaga sa patag it tennis.
Bangud sa ginpakita nga kamayad, naging kauna-unahang Pilipino si Alex Eala nga nakasueod sa Top 20 it Women’s Tennis Association ukon WTA singles rankings.
Sa pihak nga parte, uman nga maga-iba sa doubles court sanday tennis legends Venus Williams ag Alex Eala matapos nga makabaton it final main-draw wild card para sa 2026 National Bank Open.
Unang naghampang bilang magkapareha ro daywa sa Bad Homburg Open kun sa siin naka-abot sanda sa quarterfinals.
Ginaeauman kunta ro pagbalik it andang tandem sa Mubadala DC Open, apang ginpili ni Eala nga tutukan ro anang singles campaign samtang nakipareha man si Venus kay Diana Shnaider.
Makaron hay uman nga maga-iba ro daywang atleta sa doubles competition sa Toronto.
