Pagapadayunon sa gihapon it transport group nga MANIBELA ro tatlong adlaw nga untat-biyahe sa pihak it P12 nga discount kada litro it petrolyo bilang subsidy it gobyerno sa public utility vehicles (PUVs).
Raya ro ginkumpirma ni MANIBELA chairperson Mar Valbuena.
Maskin nga nalipay ro MANIBELA sa daywang piso nga gindugang sa fuel discount, ginpamilit it grupo nga bukon gihapon raya it bastante sa nagatinaas nga gaeastuson sa pagpadaeagan it public transport.
Sa separado nga pahayag, ginpabutyag man it MANIBELA nga ro subsidiya hay indi dapat magabaylo sa mabuhay eon nanda nga apela nga “just and reasonable” increase sa pamasahe.
Ginpunto man it MANIBELA ro mga problema sa pag-avail it fuel discount ag ginhambae nga maabu nga mga drayber ro owa man nagapanipueos kara bangud sa offline systems sa mga gasolinahan, limitadong numero it participating fuel outlets, ukon owa ginatau nga mga ginpromisang discount.
Bilang resulta hay ginabakae man gihapon sa ensaktong presyo ro mga produktong petrolyo it maabu nga mga drayber.
Suno kanda nga ro pagpataas sa pamasahe ro makatau it mas direktang financial relief bangud nga raya hay makadugang sa kita it mga drayber ag indi eon kinahangean nga magsalig sa mga gasolinahan para mabaton ro benepisyo.
