Sa pihak it mga mabug-at nga ebidensiya nga ginplastar kontra kay Vice President Sara Duterte sa nagapadayun nga impeachment case, apang nagapati ro sangka political observer nga masarangan nana raya nga maeampasan.
Raya ro ginpahayag ni Rev. Fr. Atty. Jude Rebaldo, kora paroko it St. Isidore the Farmer Church sa banwa it Nabas ag sangka abogado.
Suno kana nga sa pinaka-uilihi nga impeachment hearing hay mas pa nga nagbug-at ro mga ebidensiyang ginplastar kontra sa bise presidente matapos nga gin aku it dating Office of the Vice President Special Disbursing Officer nga si Gina Acosta nga gimandu sigon ni Duterte ro pagpaguwa it P125 milyon confidential fund ag pag-turn over kay Col. Raymund Dante Lachica nga nagatindog kato nga pinuno it Vice Presidential Security and Protection Group.
Base sa mga dokumento, ro P125 milyon hay gindeklarang nagastos sa sueod eamang it 11 diyas.
Dugang pa ni Fr. Rebaldo nga maskin nga pwedeng ipamilit it bise presidente nga owa imaw it direktang kasayuran sa nasambit nga mga naging transaksyon, apang pwedeng gamiton kontra kana ro angot sa command responsibility, kun sa siin dapat nga gina-check nana it mayad ro mga dokumento antes nga pirmahan.
Sa pihak kara, nagapati imaw nga posibleng maging iba ro resulta kon maipaguwa eon it mga senator-judges ro andang desisyon.
Para sa conviction, nagakinahangean it 2/3 votes base sa Konstitusyon.
Bangud kara, maskin may mga ebidensiyang magadum-ok kana sa kaso, apang nagapabilin ro posibilidad nga ma-acquit si VP Sara bangud sa numero it anang mga kaalyado sa senado.
