Gin-engganyo ni Bishop Oscar Jaime Florencio it Military Ordinariate of the Philippines ro mga ginikanan nga indi ipasa sa ibang tawo ro nagapangunang responsibilidad sa pagpabahoe ag paghubog sa andang mga unga.
Suno kay Bishop Florencio, dapat magapabilin nga unang titser it mga unga ro andang mga ginikanan, eabi eon sa pagturo it pagtuo sa Diyos, mayad nga pagbinatasan ag pagtau it importansiya sa isigkatawo. Dugang pa kara nga ro mga leksyon nga unang natun-an sa baeay hay pwedeng magpabilin sa isip it mga unga samtang sanda hay nagabahoe.
Ginpamilit man it obispo nga importanteng pabaskugon ro pamilya bangud nga raya ro pundasyon it sosyudad. Suno kana nga ro maayos nga pag-giya it mga ginikanan hay makabulig sa paghubog it mayad nga karakter it mga unga ag pwedeng makabulig agud nga malikawan ro kinagamo sa mga pamatan-on, partikular sa mga eskwelahan.
Gin-engganyo man nana ro mga mag-asawa nga magbilog it matibay nga pamilya ag giyahan ro andang mga unga nga mapabaskog ro pagtuo.
Ginpasiguro man ni Bishop Florencio nga haum nga mag-alalay ro Simbahan sa mga pamilyang nakaka-eksperyensiya it pagsubok.
