Ginasueong ni Senate Minority Leader Alan Peter Cayetano ro mga tikang agud nga maprotektahan ro kinamatarung ag pagpati it mga Muslim sa Pilipinas, kaibahan ro pagpatuman it mga sueundanan sa Islamic burial, paggamit it makabag-ong teknolohiya sa autopsy, ag pagtaeana it espasyo para sa nagkaeain-eain nga relihiyon sa mga pampublikong sementeryo.
Sa pagpamati it Senate Committee on Cultural Communities and Muslim Affairs ko Oktubre 21, gin-engganyo ni Cayetano ro Department of Health (DOH) nga insigidang ipaguwa ro implementing rules and regulations it Philippine Islamic Burial Act nga naging laye ko Abril 2025.
Ginsuhestiyon man it senador ro paggamit it makabag-ong forensic technology agud nga mapatigayon ro kinahangeanon nga autopsy sandig sa pagpati it mga namatay ag andang pamilya. Kaibahan kara ro pagtuon sa mga kagamitang pwedeng gamiton nga owa ginabuksan ukon direktang ginabuytan ro eawas.
Mag-eowas kara, ginsuportahan ni Cayetano ro uman nga pagtalakay sa Equal Access to Public Cemeteries Act, nga na-veto ni Pangueong Ferdinand Marcos Jr., ko Setyembre 2025 bangud sa mga isyung konstitusyonal.
Tuyo it proposisyon nga magtaeana it espasyo sa mga pampublikong sementeryo para sa mga Muslim, katutubo ag iba pang relihiyosong grupo.
Gin-engganyo man nana ro komite nga magpangayo it legal nga opinyon halin sa mga eksperto sa Konstitusyon agud nga matumod kun paalin nga maipatuman ro proposisyon sandig sa laye ag sa prinsipyo it separation it Simbahan ag Estado.
