Exotic na ibon, pumasok sa paliparan sa Chicago at nanuklaw ng mga pasahero

Isang kakaibang berdeng ibon na pinaniniwalaang loro ang nakapasok sa terminal ng O’Hare International Airport sa Chicago, Estados Unidos, at nanuklaw ng mga pasahero at empleyado ng paliparan.

Sa mga video na kuha noong Oktubre 13, makikitang dumapo ang ibon sa ulo ng ilang pasahero at sa kanilang mga bagahe malapit sa check-in counter ng Air France sa Terminal 5.

Nagiging agresibo rin ito sa mga taong sumusubok na hulihin o hawakan ito.

Ayon sa isang empleyado ng paliparan, nakapasok ang ibon sa terminal sa pamamagitan ng bukas na pinto.

Kalaunan, nahuli ito ng isang janitor gamit ang damit at dinala sa beterinaryo upang suriin at alamin kung mayroon itong microchip na maaaring makatulong sa pagtukoy sa may-ari nito.