KALIBO, Aklan — Nagapati ro pamilya it 18-anyos nga si alyas “Gang-ging,” nga naaresto sa sangka controlled delivery operation it Philippine Drug Enforcement Agency (PDEA)-Aklan, hapon it Huwebes, Oktubre 29, 2026 sa Sitio Guba, Barangay Tigayon, nga biktima sigon it frame-up ro andang unga.
Suno kay Chillie Mae Quives, ina it suspek nga owa it ginatago nga sekreto kanda ro andang panganay nga unga ag owa raya it kahilabtanan sa pagbaligya it ilegal nga droga.
Mabahoe ro anang pagduda nga may kahilabtanan ro dating grupo it anang unga rason nga ginpasibangdan ag gindaeahig sa nasambit nga kaso.
Ginpahayag ni Quives nga nakibot eon lang sanda kat nag-aeabutan ro mga operatiba ag gin-aresto ag ginposasan ro anang unga.
Ginreklamo man nana ro pagtutok kanda it baril it mga PDEA agents.
Ginkwestiyon man ni Quives ro kaangtanan it anang unga sa parcel nga gina alegar nga may sueod nga marijuana.
Ginpamilit nana nga piyesa eamang para sa nasamad nga motorsiklo ro ginahueat nga padaea it anang unga.
Owa sigon imaw it nakitang parcel nga buyot it anang unga kat arestuhin raya kun sa siin ro nasambit nga pakete hay ginpaguwa sigon it sangka PDEA agent halin sa puting saeakyan.
Nagapati ro ina nga magaguwa ro bilog nga kamatuoran ag ginpamilit nga owa it saea ro anang unga.
Madumduman nga masobra sa tunga sa kilo it suspected marijuana ro nakumpiska it PDEA-Aklan sa nasambit nga operasyon.
Presenteng sa kustodiya it ahensya ro suspek ag nagapangatubang sa kasong pageabag sa Republic Act 9165 ukon Comprehensive Dangerous Drugs Act of 2002.
