KALIBO, Aklan — Patuloy na tinututukan ng Land Transportation Office (LTO)-6 ang mga ilegal na operator na bumibiyahe nang walang prangkisa habang papalapit ang Undas.
Ayon kay LTO-6 Regional Director Atty. Gaudioso Geduspan II, nagpapatuloy ang kanilang pagbabantay sa mga terminal sa Iloilo City, lalo na sa inaasahang pagdami ng mga pasaherong umuuwi sa kani-kanilang lugar upang dalawin ang mga yumaong mahal sa buhay.
Pokus ng kanilang Oplan Biyaheng Ayos: Undas 2026 ang mga pampasaherong sasakyan, partikular ang mga colorum o ilegal na operator.
Batay sa pinakahuling datos ng LTO-6, kabilang sa mga nahuhuling colorum unit ang mga sasakyang pinatatakbo ng mga rent-a-car service na walang kaukulang awtorisasyon.
Nagbabala rin si Geduspan sa panganib ng pagsakay sa mga colorum na pampublikong sasakyan, lalo na kung masangkot sa aksidente.
Nagsimula ang Oplan Biyaheng Ayos: Undas 2026 noong Oktubre 23 at magtatagal hanggang Nobyembre 4, 2026.
