Hugot nga ginpanginwaea it Philippine National Police (PNP) ro nagakalhit nga impormasyon angot sa gin-alegar nga shoot-to-kill order kontra kay Senador Ronald “Bato” dela Rosa.
Suno kay Police Colonel Allen Rae Co, owa nagpaguwa ro PNP it maskin anuman nga mandu nga nagapatuman it nasambit nga operasyon kontra sa senador.
Ginpahayag man ni Co nga ro anuman nga operasyon nga may kaangtanan kay Dela Rosa hay pagahimuon sandig sa laye ag nagakaigo nga legal nga proseso.
Ginpadumdum man it PNP ro publiko nga mangin mapagbantay sa nagakalhit nga impormasyon ag magpati eamang sa opisyal ag masaligan nga mga sources.
Nasayuran nga nagapangatubang si Dela Rosa sa arrest warrant nga gin-isyu it International Criminal Court (ICC) may kaangtanan sa alegasyon it crimes against humanity nga nag-ugat sa kampanya kontra droga it administrasyon ni dating Pangueong Rodrigo Duterte.
Nauna eon nga gin-anunsyo ni DILG Secretary Jonvic Remulla ro ginapatuman nga ₱50-milyon nga patong sa ueo it senador.
