Sangka eaeaki sa Siberia, gintubuan it tanum sa sueod it anang mata

Sangka 42-anyos nga eaeaki sa Siberia, Russia ro nakaangkon it tumaeagsahon nga kondisyon matapos tumubo ro sangka tanum sa sueod it anang mata.

Ginkilaea ro eaeaki nga si Maxim Sleptsov nga naka-eksperyensiya it ap-at nga buean nga pagsakit it ueo, paglabo it panan-awan ag paghaeok it mata matapos tamaan it sanga samtang nagabakasyon.

Natukiban it mga doktor nga may naaywan gali nga binhi sa anang mata nga amat-amat nga nagtubo ag nagpaguwa it ugat nga nag-abot sa tatlong milimetro.

Madinaeag-on man nga nabo-oe it mga espesyalista ro nagtubo nga binhi gamit ro injection needle.

Sa makaron, maayos eon ro kahimtangan ni Sleptsov, naduea eon ro pagpaeanakit it anang ueo ag nagbalik eon sa normal ro anang panan-awan.