Nakuhit it tanan nga local nga gobyerno sa Western Visayas ro 100 porsiyentong pagsunod sa Full Disclosure Policy (FDP) it gobyerno sa it ap-at nga magkasunod nga quarter, suno sa Department of the Interior and Local Government (DILG)-6.
Sakop kara ro pangaywa, pangatlo ag pang-ap’at nga quarter it 2025, pati eon man ro unang quarter it 2026.
Kaibahan sa mga nakasunod ro mga probinsya it Aklan, Antique, Capiz, Guimaras ag Iloilo, kaibahan ro Iloilo City ag iba pang syudad ag munisipalidad sa rehiyon.
Sa idaeom it FDP, ginmanduan ro mga LGU nga ibulgar sa publiko ro andang mga dokumentong pinansyal, kaibahan ro badyet, kita, gaeastuson, pondo para sa edukasyon ag kalamidad, pati eon man ro mga transaksiyon sa pagbakae it mga produkto ag serbisyo ag resulta it bidding para sa mga proyekto.
Tuyo kara nga mataw-an ro publiko it kahigayunan nga masubaybayan kun paano ginagamit ag ginataeana ro pondo it gobyerno.
Sa pihak nga nagapakita it pagsunod sa mga kinahangean sa transparency ro pagkuhit it 100 porsiyentong compliance, uwa raya awtomatikong nagakahueugan nga uwa it iregularidad ukon mayad nga nagamit ro tanan nga pampublikong pondo.
Apang, importanteng tikang raya para mapabaskog ro saeabton it mga lokal nga opisyal, malikawan ro korapsyon ag maengganyo ro aktibong pakiki-partisipar it mga pumueuyo sa pagbantay sa paggastos it andang mga buwis.
