Kumpiyansa si Atty. Nicholas Kaufman, ro nagapangunang abogado ni dating Pangueong Rodrigo Duterte, nga may mabaskog nga argumento sigon sanda para punduhon ro kaso kontra kay Duterte sa International Criminal Court (ICC) antes pa man raya umagi sa pagbista.
Ginpamilit ni Kaufman nga bukon sakop it hurisdiksiyon it ICC ro kaso bangud sa paghalin it Pilipinas sa international court antes pa man gin-authorize ro imbestigasyon kontra sa dating Pangueo.
Dugang pa ni Kaufman nga ro pag-withdraw it Pilipinas halin sa ICC hay naging epektibo antes pa man mag-umpisa ro andang imbestigasyon. Nagasalig man rayang maging madinaeag-on ro andang depensa kun mabaton it korte ro andang argumento nga maga-bukas man sa posibilidad nga indi madayon ro confirmation-of-charges hearing nga nakataeana sa Setyembre 23, 2025.
Samtang, ginpaathag pa ni Atty. Kaufman nga ro pag-aresto kay Duterte ag ro madasig nga pagpasa kana sa ICC hay sangka “kidnapping” ag “extrajudicial rendition,” nga eabag sigon sa laye it Pilipinas. Apang una eon nga ginpahayag it gobyerno it Pilipinas nga ro pagsuko kay Duterte sa ICC hay parte eamang it anang obligasyon sa International Criminal Police Organization ag uwa nagakahueugan nga gina-palagay nandang may saea ro dating Pangueo.
