KALIBO, Aklan—Maskin nga libre ro tickets sa 32nd Southeast Asian Games sa Phnom Penh, apang kinahangean nga magpa-book.
Suno kay Bombo International Correspondent Vernon Moises nga tuyo kara nga ma-kontrol ro mga magatan-aw sa venue partikular sa hampang nga football nga ginadagsa it mga tawo.
Kinahangean sigon nga mag agto sa SEA Games app agud nga makabo-oe it ticket.
Gindugang pa ni Moises nga ginmandu ni Cambodian Prime Minister Hun Sen nga obrahon nga libre ro ticket sa tanan nga mga hampang para sa SEA Games sa Mayo 5 hasta 17 agud nga mataw-an it kahigayunan ro tanan nga makatan-aw para sa parehong Cambodians ag foreigners.
Mag-eowas kara, indi man pagasukton ro mga international broadcasters para sa pagahimuon nga live television rights agud nga mag-cover sa 608 nga events sa 37 nga mga sports nga pagahiwaton.
