KALIBO, Aklan—Opisyal eon nga ginkumpirma it Department of Education (DepEd)-VI pinaagi sa sangka sueat ro paghost it probinsya it Aklan it Western Visayas Regional Athletic Association (WVRAA) Meet 2023 nga pagahiwaton umpisa Abril 26 hasta 30.
Suno kay Dr. Feliciano Buenafe, Schools Division Superintendent it DepEd-Aklan nga natumod eon nanda ro mga playing venues ag billeting quarters kung siin pagahiwaton ro hampang ag magatinir ro mga delegado.
Sigidas man sigon ro andang koordinasyon sa mga lokal nga gobyerno nga may sakop sa mga na-identify nga area.
Tuyo kara nga masiguro ro maayos nga preparasyon kaeakip ro seguridad ag kaeuwasan it mga bisita.
Ro delegasyon it Iloilo hay magatinir sa Kalibo Elementary School ag Kalibo Pilot Elementary School samtang sa Aklan National High School for Arts and Trades (ANHSAT) hay ro Antique delegation; ro mga maghalin mat-a sa Guimaras hay gintaeana sa Makato, Negros Occidental sa Banga ag ro taga-Capiz hay sa Malinao.
Ro mga gaeastuson kapareho it transportasyon ag pagkaon hay sabat it tagsa ka mga delegasyon.
Ginaeauman nga naga-abot sa 3,000 ka mga delegasyon ro maga-abot sa Aklan halin sa nagkaeain-eain nga probinsya it Western Visayas.
Sa pihak nga parte, nakataeana man nga pagahiwaton ro provincial meet sa buean it Marso.
Dikara sigon masayuran kung sin-o ro mga magapasakop sa nagkaeain-eain nga sporting events para sa WVRAA Meet.
