KALIBO, Aklan — Nagaeaum si Atty. Plaridel Morania, sangka law expert nga kabay nga mapatuman it husto ro mga manami nga ordinansa sa probinsiya it Aklan para sa kamaeayran it mga pumueuyu.
Raya hay kasunod it pagpabakod it provincial government it Aklan sa sangka makasaysayang anti-discrimination ordinance nga nagaprotekta sa kinamatarung it mga marginalized nga grupo, kaibahan eon ro base sa sexual orientation, gender identity and expression, ag sex characteristics (SOGIESC).
Gin-aprubahan it Sangguniang Panlalawigan ro Aklan Anti-Discrimination Ordinance ko Abril 21, sa pagpanguna ni SP member Edmundo Tolentino Jr. ag co-sponsor si SP Jay Tejada.
Sa idaeaum it nasambit nga ordinansa, ginabawae ro diskriminasyon sa parehong pampubliko ag pribadong sektor base sa lahi, ethnicity, lenggwahe, kasarian, edad, relihiyon, kapansanan, SOGIESC, health status, lebel sa sosyudad ag physical appearance.
Ginamandu it laye ro mga mekanismo para sa pag-report it mga pag-eabag, pagpatigayon it public education, ag pagpatuman it ordinansa sa mga lugar kapareho it mga lugar it trabaho, eskwelahan, opisina it gobyerno, health institution ag public spaces kapareho it transportasyon ag pabaeay.
Ro mga pampubliko ag pribadong institusyon hay ginamanduan nga magpatuman it mga internal nga polisiya ag magpatigayon it mga training agud nga makahimo it mga inclusive ag eowas nga palibot.
Ro mga nag-eabag hay pwedeng magapanabat sa laye nga may penalidad nga P1,000 hasta P5,000 nga multa, pagkakulong it 50 diyas hasta sang dag-on ag serbisyong pampubliko, depende sa pagdesisyon it korte.
Ginapasiguro man it ordinansa ro proteksyon kontra sa pagbaeos para sa mga biktima ag mga whistleblower.
Ro Aklan ro ika-12 nga probinsya sa Pilipinas nga nagpatuman it makarondaya nga klase it lehislasyon.
