KALIBO, Aklan—Nagapadayun ro distribusyon it Aklan Provincial Government it financial assistance sa mga hog raisers nga naapektuhan it African Swine Fever ukon ASF.
Suno kay Provincial veterinarian Dr. Mabel Siñel nga sa kabilugan nga P7 milyon nga gintaeana nga pondo, haeos P3.9 milyon eon ro nagamit para sa ap-at nga banwa nga nakasumite it kompleto nga mga requirements halin sa 14 nga munisipalidad nga may nailistang kaso it sakit.
Igapatuman sigon nanda ro “first come, first serve basis” nga patakaran sa pag-release it nabilin nga ayuda nga haeos P3.4 milyon.
Kadungan kara, nagpaandam ro taeatapan sa natungdan nga Municipal Agriculturist Office nga hasta eon lang sa Agosto 31 ro andang deadline sa pagbaton it mga dokumento.
Aminado ro OPVET nga kueang ro gintaeana nga pondo nga halin sa P10 milyon nga quick response fund nga ginbo-oe sa kabilugan nga P25 milyon nga calamity fund it probinsiya.
Ro mga hog raisers hay makabaton it cash aid nga nagahalin sa P3,000 hasta P15,000 kada sambilog depende sa gin-assess ag gin-validate nga numero it alagang baboy nga ginpaidaeum sa culling.
Naga abot eon sa 4,064 ro baboy nga gin-cull sa Aklan.
Masobra sa 40,000 nga mga alagang baboy man ro namatay matapos nga dapuan it ASF.
Nasayuran nga ro mga banwa it Libacao, Madalag ag Buruanga eon lang ro ginakabig nga ASF free, apang ginasugid nga may napabalita man nga pilang baboy ro nagkaeamatay sa indi masayuran nga dahilan.
Samtang, umpisa ko Enero hasta Hunyo nga inventory, may una pa nga 72,692 nga baboy ro nabilin sa probinsiya, apang nagapati ro OPVET nga posibleng ro iba kara hay ginkatay eon.
