KALIBO, Aklan—Ginkumpirma it Aklan United Hog Raisers Association ukon AURA nga manaba ro supply makaron it baboy sa probinsiya it Aklan bangud nga nagsangkiri ro mga naga-alaga it baboy partikular ro mga backyard hog raisers.
Suno kay Alice Gonzales-Manlabao it AURA nga ko nagtaliwan nga buean it Oktubre hay bastante pa ro supply kara, apang bangud sa pagtama it outbreak it African Swine Fever sa probinsiya it Iloilo hay maabu nga hog-raisers ro naalarma ag owa eon nagpa-breed ag owa eon nag alaga sa pagkabaeaka nga tamaan it sakit ro andang kasapatan.
Mag-eowas kara, ginareklamo man nanda ro masyadong barato nga presyo it live weight ukon buhi nga baboy kamana man nga nagtaas ro presyo it bahog ukon feeds.
Sa pihak nga parte, pabor sigon sanda sa ginpaguwa nga Executive Order No. 21 ni Aklan Governor Joen Miraflores nga nagabawae sa pagpasueod it mga processed meat products ag karne it baboy sa probinsiya.
Raya hay kasunod it pag-inabu it kaso it ASF sa kaiping nga probinsiya it Capiz.
Apela pa nana nga bantayan it husto it mga otoridad ro mga nagapatigayon it online selling it mga processed meat products nga indi sigon nanda matumod kon paalin nga nakaka-eusot pasueod sa Aklan.
Sa pihak nga parte, padumdum pa nana sa mga hog raisers nga hugut nga sundon ro bio-security protocol agud nga malikawan ro ASF ag iba pang preventive measures.
Ginkalipay man nana ro balita nga may na-develop eon nga bakuna kontra sa ASF maskin nga bukon pa raya it available sa merkado.
