KALIBO, Aklan—Nagta-o it inspirasyon sa tanan nga mga pamatan-on ag estudyante ro sangka Aklanon matapos nga maga-graduate bilang Suma Cum Lmaude ag Class Valedictorian 2023 sa University of the Philippines (UP) Manila nga may general average nga 1.0996.
Si Ivanne Joepert Abello Idorot nga residente it banwa it Banga hay magatapos sa kursong Bachelor of Science in Biology nga may pinakamataas nga latin honor.
Suno kana, bukon it raya nga kurso ro anang unang choice kundi ro engineering apang sa katung-anan sigon it anang pag-eskwela hay narealize nana nga bukon it para kana ro nasambit nga kurso bangud nga uwa imaw naga-exceel sa subject nga Mathematics.
Bangud kara, nagpili imaw it kurso nga maga-exceel it husto ag raya hay ro sa patag nga paadto sa medisina.
Maskin nga naagyan it pandemya hay nagpadayon imaw sa anang pag-eskwela sa pihak it mga hangkat ag natapos ro pilang dag-on sa kolehiyo.
Samtang, eubus man nana nga ginpasaeamatan ro anang pamilya nga nagsuporta sa anang journey ag ginahaead nana raya nga kadaeag-an sa ana nga mga ginikanan ag sa mga Aklanon.
Hin-aga nga adlaw it Lunes, Agosto 7 ro andang graduation ag imaw ro napilian nga magdiskurso sa atubang it tanan nga magagradwar nga estudyante it sambilog sa mga prestihiyosong eskwelahan sa Metro Manila.
