MALAY, Aklan — Nagpahayag man it mabaskog nga pagkontra ro Liga ng mga Barangay Aklan chapter sa planong Boracay Bridge bangud sa posibleng epekto kara sa environment ag pangabuhian .
Suno kay Sangguniang Panlalawigan Ex-Officio member ag Caticlan Punong Barangay Rannie Tolosa nga ko nagtaliwan pa nga dag-on hay nakahimo eon sanda it resolusyon angot kara .
Gin-insister nana nga na-bypass kara ro andang barangay kamana man ro banwa it Malay ag probinsiya it Aklan bangud sa kawad-an it konsultasyon.
Mabahoe nga kwestiyon suno kana nga naaprubahan ro proyekto nga owa it bendisyon halin sa barangay, lokal nga gobyerno it Malay ag provincial government it Aklan.
Nauna eon nga nagpanindugan ro SB Malay pinaagi sa sangka resolusyon nga owa sanda it nabaton nga pormal nga proposal halin sa San Miguel Holdings Corp.
Raya hay ginsundan man it resolusyon it provincial board nga nagahambae nga owa it ginpatigayon nga public consultation.
Samtang, ro proyekto nga igapatuman sa idaeum it Build-Operate-Transfer scheme hay ginaeakipan it 2.54-kilometrong tulay nga may access para sa public transport, pedestrian lanes, bikeways, ag utilities.
Ro San Miguel Holdings Corporation ro nagasueong it Boracay Bridge Project pinaagi sa pagsumite it unsolicited proposal sa DPWH ko Pebrero 14, 2018.
Sa pihak kara ro ginaproponer nga infrastructure development hay padayun nga nagapangatubang sa kritisismo bangud sa potensyal nga “environmental damage ag economic impacts,” kaibahan eon ro displacement it mga bangkero ag mga trabahador sa pantalan.
Ro pag-apruba ag implementasyon it proyekto hay hugut nga ginakontra it pilang stakeholders ag mga tumandok.
