Paga-umpisahan it Alas Pilipinas Women ro andang kampanya sa unang leg it 2026 SEA V Cup pinaagi sa pag-atubang sa host Vietnam makaron nga adlaw it Biyernes sa Dong Anh Gymnasium sa Hanoi.
Pagapangunahan nanday Bella Belen, Vanie Gandler ag Erika Santos ro national team sa idaeum ni Japanese coach Taka Minowa, nga nagaeaum nga makalista it manami nga umpisa sa torneo.
Bago pa man ro andang unang hampang, nagapangatubang ro mga participants sa isyu it bukon sigon it patas nga pagtrato sa mga koponan.
Una eon nga ginreklamo it Thailand ro masobra sa sang oras nga biyahe paagto sa playing venue, kakueangan it air conditioning sa training facility, ag paggamit it luma ag mabug-at nga training balls, samtang mas maeapit sigon ro venue it host Vietnam.
Sa pihak kara, nagapabilin nga determinado ro Alas Pilipinas nga maipakita ro bunga it andang pagpahaum matapos ro pilang domingo nga training.
Kaibahan man sa line-up it koponan sanday Thea Gagate, Eya Laure, Dawn Catindig, Dell Palomata, Mars Alba, Jasmine Jazareno, Fifi Sharma, Lams Lamina, Jia de Guzman, Nina Ytang, Alyssa Solomon, Vange Alinsug ag Arah Panique.
Samtang, bukon it kaibahan sa torneo sanday Shaira Jardio, Celine Marsh, Angel Canino ag Amie Provido bangud sa andang academic commitments.
Matapos ro hampang kontra Vietnam, masunod nga maka-atubang it Alas Pilipinas ro Thailand sa Agosto 1 ag Indonesia sa Agosto 2.
