Nagapadayon ro winning streak ni Alex Eala sa Toronto, nga pito eon ka sunod-sunod nga daog, samtang magaatubang imaw kay anay World No. 4 Belinda Bencic sa Round of 16 it WTA 1000 tournament sa Sobeys Stadium.
Mas nagabaskog man ro suporta it mga Filipino fans kay Eala sa kada anang pagdaog.
Ginakabig it Filipina tennis star nga mabahaoe nga bulig ro kusog it crowd, nga nagatao kana it dugang nga emosyon ag motibasyon sa court.
Ku ulihi nga match, naeampasan ni Eala si American Caty McNally, 6-3, 5-7, 6-4, sa isaea ka laban nga nagbuhay it daywa ka oras ag 39 minutos. Nakabatyag man imaw it problema sa anang ankle, pero ginpahayag nana nga okay ro anang kondisyon.
Samtang, si Bencic hay kilaea nga mas gusto ro matawhay ag kalmado nga palibot sa paghampang.
Nagaatubang man imaw sa mabaskog nga Filipino crowd nga nagasuporta kay Eala.
Para kay Eala, bukon eang crowd support ro anang sandigan.
Nagasalig man imaw sa anang agresibo nga baseline play, mental toughness ag mas nagakabaskog nga serve.
Si Bencic man hay nagasalig sa ana nga abilidad sa pag-redirect it pace, eksaktong groundstrokes ag maayos nga anticipation.
Pareho nga naghalin sa mabudlay nga laban ro daywa ka players.
Si Eala nagdaog kontra McNally, samtang si Bencic nagkinahangean it tatlo ka oras ag 24 minutos para mapierdi si Taylor Townsend.
Raya ro una nga Tour-level meeting nanday Eala ag Bencic.
Nagapangita si Eala it anang ikatatlo nga WTA 1000 quarterfinal kara nga dag-on, samtang si Bencic nagapangita it anang ikaapat nga quarterfinal appearance sa Canada.
