KALIBO, Aklan–Antes ro Mayo 10 nga deadline, syento porsiyento eon nga natapos it 327 nga barangay sa bilog nga probinsiya it Aklan ro pagpanupod sa first tranche it emergency cash subsidy sa idaeum it Social Amelioration Program (SAP) sa tunga it coronavirus disease 2019 (COVID-19) pandemic.
Suno kay Engr. Carmelo Orbista, provincial director it Department of Interior and Local Government ukon DILG-Aklan nga maskin nga nakompleto eon ro distribution, apang ro utilization hay bukon pa it 100%.
Pila suno kana sa mga beneficiaries hay owa nakabaton it ayuda matapos nga owa nakasueod sa guidelines sa ginpatigayon nga validation eabi eon ko tiempo it pay-out.
Posible suno kana nga igapaguwa it Department of Social Welfare and Development (DSWD), ro second wave it SAP subsidies antes ro Mayo 20 sa mga LGUs nga nakasumite eon it kompleto nga liquidation reports sa first phase it implementasyon it cash aid.
Ro DSWD sigon ro nagapatigayon it validation agud nga masiguro nga ro recipients it first tranche hay eligible ag owa it kaso it duplication.
Sa pihak nga parte, gindugang pa ni Engr. Orbista nga ro Aklan hay 100% man nga compliance sa posting it beneficiaries sa mga barangay hall nga gin-post man it DSWD sa andang website.
Ro SAP beneficiaries sa region 6 hay nakabaton it P6,000 nga ayuda kada pamilya.
Samtang, gindugang pa kara nga padayun sanda nga nakakabaton it reklamo kontra sa mga barangay ag local officials angot sa gina-alegar nga iregularidad sa SAP distribution.
Gin-refer ag gina-imbestigahan eon sigon ro mga raya it Philippine national police ukon PNP.
Sa pihak nga parte, gindugang pa ni engr orbista nga ginahueat nanda ro guidelines ukon sueundanan halin sa Inter-Agency Task Force on Emerging Infectious Diseases (IATF-EID) sa oras nga ipaidaeum eon sa modified GCQ ro Aklan sa Mayo 16.
