KALIBO, Aklan—Ginkumpirma ni Punong Barangay Neil Candelario it Poblacion, Kalibo nga sambilog sa mga natalakay sa andang ginpatigayon nga barangay assembly ko Sabado nga adlaw ro angot sa Anti Drug Campaign it gobyerno.
Suno kana nga ro kaundan it “Buhay Ingatan, Droga Ayawan” ukon BIDA program it Department of the Interior and Local Government ukon DILG, kun sa siin ginpaathag sa mga constituents nga raya hay sangka nationwide anti-narcotics drive nga nagatuyo nga suk-ean ro illegal drugs pinaagi sa pagtutok sa demand reduction ag rehabilitasyon it komunidad.
Sa pihak nga parte, gindugang pa ni kapitan Neil nga naging madinaeag-on sa pangkabilugan ro asembliya nga gintambungan it masobra sa 400 nga katawo partikular ro mga miyembro it 4P’s ag senior citizens.
Gindugang pa it opisyal nga raya hay sangka oportunidad agud nga maipaabot sa komunidad ag mapaathag kanda ro kooperasyon ukon pakikipagbueuligan nga ginapangayo it barangay para sa mga igapatuman nga programa ukon proyekto it gobyerno.
