KALIBO, Aklan — Nakakumpiska ro Aklan Police Provincial Office (APPO) it mga ilegal nga firecrackers nga nagabalor it P7,500 sa ginpatigayon nga intensified crackdown kontra sa mga ilegal nga paeupok ag pyrotechnics ko Disyembre 30, 2024.
Suno kay P/Capt. Aubrey Ayon, tagapaghambae it APPO nga ro simultaneous operations hay ginpangunahan ni P/Lt. Col. Ricky Bontogon ag Regional Civil Security Unit, kun sa siin gin-agtunan it andang inspection team ro 46 nga mga retail locations sa Numancia, Lezo ag Kalibo.
Pila sa mga nakumpiska hay ro whistle bomb, judas belts, imported fountains ag candle bombs.
Raya hay bilang kaparte it “Ligtas Paskuhan 2024” safety campaign, para sa masadya ag matawhay nga selebrasyon it Bag-ong Dag-on sa probinsiya.
Samtang, nakataeana nga igapatigayon ro pagsamad ukon disposal sa mga nakumpiska nga illegal firecrackers.
Sa pihak kara, ginpahayag it opisyal nga nakalista it kapin sa 14 nga mga insidente nga may kaangtanan sa paeupok ko Paskwa ag sa pagsug-aeaw it Bag-ong Dag-on base sa datos it Department of Health (DOH)-Aklan.
Sa mayad nga swerte ag ro mga raya hay nag angkon eamang it minor injuries ag gin-refer sa out patient department .
Samtang, ginkumpirma man ni P/Capt Ayon nga generally peaceful ro selebrasyon it Bag-ong Dag-on ag owa it nairecord nga anuman nga major incidents mag-eowas sa firecracker related incidents .
