Ginpaabot ni US President Donald Trump nga bukon nana it kinahangean ro bulig ni Chinese President Xi Jinping agud nga tapuson ro giyera kontra sa Iran.
Suno kay Trump, magadaog sigon ro Amerika “peacefully or otherwise” samtang nagapadayun ro tensyon sa Middle East ag nagapabilin nga limitado ro pag-agi it mga barko sa Strait of Hormuz, nga gina-agyan it mabahoe nga parte it suplay it langis sa kalibutan.
Padayun sa gihapon ro owa pagkaeasugot it US ag Iran masobra sa sang buean eon matapos ro ceasefire. Gusto it US nga punduhon it Iran ro andang nuclear program ag boe-on ro kontrol sa Strait of Hormuz.
Samtang, ginhinyu man it Iran ro kabayaran sa kahalitan nga gintuga it giyera, pagbo-oe it blockade it US, ag pagtapos it bakbakan sa iba pang lugar kapareho it Lebanon.
Bangud sa tensyon, nagtaas sa masobra sa $107 kada bariles ro presyo it langis samtang nag-abot man sa $29 bilyon ro gastos it US sa giyera.
Suno man sa survey it Reuters/Ipsos, maabu sa mga Amerikano ro bukon it kumbinsido sa rason it pagsueod it US sa giyera kontra sa Iran.
