QUEZON City – Todo alerto eun man ro Armed Forces of the Philippines (AFP) para siguraduhon ro seguridad sa ikatlong State of the Nation Address (SONA) ni Pangueong Ferdinand “Bongbong” Marcos Jr., nga hiwaton sa Batasang Pambansa sa Quezon City hinaga, Hulyo 22.
Suno kay AFP Spokesperson Col. Francel Margareth Padilla, nakapahaom eun man ro puwersa it Joint Task Force-National Capital Region (JTF-NCR) para magbulig sa mga kapulisan sa pagpatuhaw it seguridad ag katawhayan sa nasambitan nga importanteng okasyon.
Una kara, ginsiguro ni Presidential Security Group (PSG) Commander Brig. Gen. Jesus Nelson Morales nga “well secured” si Pangueong Marcos ag uwa sanda it namo-monitor nga paeag sa seguridad maging bago pa ro “designated survivor” nga pahayag ni Vice President Sara Duterte.
Ro PSG ro nagapanguna sa pagtao it importansya sa seguridad it SONA katuwang ro PNP, AFP, MMDA ag iba pang security forces.
Ginpahayag man ni Col. Xerxes Trinidad, chief it AFP Public Affairs Office, una sa 500 personnel it JTF-NCR ro daywang armored vehicle sa idaeom it JTF-NCR nga andang igadeploy para sa ikatlong SONA it punong ehekutibo.
Nauna kara pahayag ni National Capital Region Police Office (NCRPO) chief Maj. Gen. Jose Melencio Nartatez Jr. nga naka-full alert status ro tanan nga mga police officers ag police units halin ku Sabado para sa SONA.
Una sa 22,000 pulis ro iga-deploy sa SONA kun siin 6,000 kara hay igakalat sa bisinidad sa Batasang Pambansa sa QC nga hiwatan it okasyon samtang una sa 2,700 ro force multipliers ag una sa 1,400 PSG personnel ro igataeana man sa SONA.
