Ginaeauman nga paga-umpisahan eon ro pagpanupod it P500 pesos nga fuel subsidy para sa mga pumueuyu antes ro May 9 election.
Ro pondo para sa nasambit nga fuel subsidy para sa low-income household hay maga-umpisa sa unused cash balances.
Sa oras nga maipaguwa ro nasambit nga pondo, ro Department of Social Welfare and Development ro ahensiya nga nagapangunang responsable para sa distribusyon it nasambit nga ayuda.
Ro household fuel subsidy hay agud nga mapahagan-hagan ro impact it presenteng fuel price crisis para sa pigado nga mga pumueuyu.
Kapareho it padumdum kon nagapanupod it ayuda sa transport groups, likawan man ro pag-epal it mga pulitiko.
Ro anuman nga ayuda halin sa gobyerno nga ginapasugtan sa Comelec ban hay indi dapat nga mamamchahan it pulitika.
Raya hay halin sa kaban it nasyon bukon it sa boesa it sin-o man nga kandidato.
Raya hay gintaeana agud nga maskin paalin hay makabukig sa gaeastuson ag bukon it para sa boto.
Kinahangean eon nga maduea sa isip it tawo ro pagpati nga kon sin-o ro nagatau it kwarta hay imaw eon lang ro igaboto.
Gasgas eon raya nga linya apang kabay nga umepekto.
Indi naton ibaligya ro atong naga-isaeahanon nga boto.
Raya ro nagasaeaming sa atong pagkatawo ag raya man ro nagadikta sa atong paeaabuton.
Indi pagpasugtan nga diktahan kita it kwarta ag sa baylo hay pabay-an nga ro atong konsensiya nga magpili it angay ag bagay nga kandidato aeang-aeang sa atong nga mga unga.
